Arazo orkorrak, irtenbide orokorrak 

Azken krisialdi finantziaren ondotik, ezagutu ditugun arazo orokorrak, irtenbide orokorretan behartzen gaituzte, guttienez, Europa mailan. Arrisku orokorreko banko handien zaintzeak, euro gunearen egiazko kudeantza, zerga sistemaren berdintze bat, Estadoen zorren bateratzea, harreman finantzieroei buruzko Europako zerga, diru espekulazioa mugatzeko, merkatuak manipulatzen dituztenen auziperatzeak, paradisu fiskalen ezeztatzeak, nazioarteko korrupzioaren borrokak, ezinbesteko neurri eta proiektu orokorrak dira, guttienez Europa mailekoak. Sistema finantzieroari berreskuratu behar diote bere egiazko papela, ekoizpen ekonomiaren diruztatzearena, Europar Batasunari baliabide berriak ekarriz. 

Tokiko lantegiak, hurbiltasunezko irtenbideak 

Momentu berean, Europar Erakundeek ohartzen dira Estado maila gero ta gehiago bere eraginkortasuna galtzen duela, monopoloen edo talde handien zerbitzuan egonez. Herrialde maila askoz hobeagoa agertzen da tokiko lantegi ttipi eta ertainen sustengatzeko. Lantegietaz hurbil izanez, Euskadi bezalako herrialdeek erakutsi dute beren gaitasuna kasuz kasu ekimen bereziak xutik ezarriz aprendizajean, formakuntzan, diruztatzean, ikerketa-garapenean edo nazioartetzean.

Globala eta lokala ezinbestekoak bilakatu dira.