Baiona Euskal Herriko Merkatal Ganbararen buru izan da 16 urtez Jean-Marie Berckmans, 4 aldiz hautatua eta berhautatua izanez. Bere presidentza garaian, proiektu egituratzaile ainitz gidatzen jakin zuen lurraldearentzat: Baionako portuaren modernizazioa, Izarbel teknopoloan ESTIA ingeniari eskolaren sortzea, Hegoaldeko ereduaren moduko klusterren ezartzea (laborantza elikaduran, eraikuntzan, turismoan)...

2002an, Akitaniako Eskualdeko Merkataritza eta Industria Ganberan hautatua, Estatuaren espiritu jakobinoaren aurka borrokatu zen, lurralde "ttipietako" enpresariekin zuen harremanean. Tokiko enpresa ttipi eta ertainen indarraz konbentziturik, Ipar Euskal Herriaren garapen ekonomikoa bultzatu nahi izan du formakuntzaren eta lurraldeko indar bizien dinamizazioaren bidez. Molde pragmatikoan, abertzaleei eskua luzatzen eta Merkatal Ganbaran lekua egiten jakin izan zuen. Horrela, sektore ekonomikoa gure lurraldearen garapen autonomoago baten zerbitzurako funtsezko tresna zela frogatzen lan eginen zuen.

EAJ-PNBk bere familiari eta hurbilekoei bere babesa eta doluminak helarazi nahi dizkie.